site шинэчлэгдэж байна...

АНУ-д онгоц байшин мөргөсний улмаас 49 хүний амь үрэгдлээ

johnyfx — Sat, 14 Feb 2009 05:54:31 GMT

Нью-Йоркийн Буффалогийн ойролцоо “Континентал” компанийн онгоц байшин дээр унаж, 44 зорчигч, хөлгийн дөрвөн гишүүн амь үрэгдсэн байна. Түүнчлэн байшин дотор байсан нэг хүн амиа алдсан тухай Нью-Йоркийн цагдаа нар мэдээлжээ. Мөн ослоос болж, ойр орчимд байсан дөрвөн хүн гэмтсэн байна.

“Континентал” компанийн 3407 дугаарын нислэг орон нутгийн цагаар 22 цаг 20 минутад осолджээ. Нью-Жерси мужийн Неваркаас хөөрсөн онгоц Буффалод буух ёстой байсан ч онгоцны буудлаас долоон километрийн өмнө унасан бөгөөд зөвхөн сүүл нь бүтэн үлдсэн аж. Ослын шалтгаан одоогоор тодорхойгүй байгаа бөгөөд тухайн үед цастай байсан нь нөлөөлсөн байж болзошгүй гэнэ. Бусад нислэгүүдийн тухайд ямар ч асуудалгүйгээр газардаж байжээ.

Конгрессийн хоёр танхим ”Обамагийн төлөвлөгөө”-ний талаар тохиролцоогоо хийлээ

johnyfx — Fri, 13 Feb 2009 15:00:45 GMT

Сенаторууд Гарри Рид (зүүнээс), Арлен Спектер нар хоёр танхимын гишүүд уулзсаны дараах хэвлэлийн бага хурал дээр

АНУ-ын Конгрессийн Сенат ба Төлөөлөгчдын танхимын төлөөлөгчид Америкийн эдийн засагт дэмжлэг үзүүлэх тухай хуулийн төслөөр бүрэн тохиролцоог хийжээ. Сенат дахь Ардчилсан намын олонхийн лидер Гарри Ридийн хэлснээр хоёр танхимын зөрөлдөөн "бага байсан" учир тэд түүнийг бүрэн арилгаж чадсан гэнэ.

"Обамагийн төлөвлөгөө" гэж нэрлэгдсэн хуулийн төсөл анхны хэлэлцүүлгээрээ нэгдүгээр сарын 30-нд Төлөөлөгчдийн танхимаар батлагдаад энэ сарын 10-нд Сенатын хэлэлцүүлгийг даван дэмжигджээ. Хоёр танхим уг төслийг батлахдаа тус тусдаа өөрчлөлт оруулсан ба түүнийг зохицуулан тохирох хэрэг гарсан билээ.

Сенатор Сьюзан Коллинзийн хэлснээр хуулийн эцэслэн батлагдсан хувилбараар эдийн засгийг дэмжихэд 789 тэрбум ам.доллар гаргахаар болсон байна. Тэр нь анхлан тусгагдсан хэмжээнээс бага байгаа юм. Энэ мөнгөний 35 хувь нь татварын хөнгөлөлтийн хэлбэрээр үлдсэн хэсэг нь шууд хөрөнгө оруулалтаар зарцуулагдах ажээ. Мөн шинэ хуулиар бий болгох ажлын байрны тоог нэмэгдүүлсэн байна.

Мөн сургуулийн шинэчлэл ба тоноглолтод гаргах 10 тэрбум ам.долларын хөрөнгийн асуудлаар тохиролцоог Төлөөлөгчдийн танхимын дарга Нэнси Пелози, Гарри Рид нарын уулзалтаар үргэлжлүүлэн ярилцжээ. Сенатын баталснаар энэ заалтыг "төрийн тогтворжилт" гэсэн хэсэгт оруулсан ба мөнгө зарцуулалтыг мужийн захирагч нараар дамжуулан хуваарилахаар заажээ. Харин Төлөөлөгчдийн танхимын баталсан хувилбарт энэ мөнгийг шаардлагын дагуу шууд гаргахаар заасан байв.

Залуу эдийн засагчид хямралын эсрэг нэгдлээ

johnyfx — Fri, 13 Feb 2009 14:59:04 GMT

Монголын хэсэг залуу эдийн засагчид нэгдэн, улс орноо эдийн засгийн хямралаас хэрхэн гаргах арга замыг тусгасан санамж бичгийг Засгийн газар болон УИХ-д хүргүүлэхээр болжээ.

Т.Мөнхтөр, Б.Цогт-очир, С.Цолмон, О.Жавхлан нарын эдгээр залуу эдийн засагчид МУИС, СЭЗДС-ийг 2008 онд төгссөн бөгөөд хямралыг даван туулахад Монгол Улсын Засгын газар, УИХ, төрийн болон төрийн бус байгууллагууд, эрдэмтэн судлаачид, ард иргэдийн хамтын оролцоо нэн чухал байгаа учир өөрсдийн санаа бодлыг хуваалцахыг хүсчээ.

Залуу эдийн засагчид монголд хямрал нүүрлэх болсон шалтгааныг зах зээлийн эдийн засагт шилжээд 20 гаруй жил болоход өнөөг хүртэл олон тулгуурт эдийн засгийн тогтолцоог бий болгож чадаагүйтэй холбоотой хэмээн тайлбарлаж байв. Мөн хямралаас гарахад дэмжлэг болох банк санхүүгийн тогтолцоонд улсын банкыг бий болгож , үйлдвэрлэгчдэд шаардлагатай санхүүгийн нөөцийг уг банкаар дамжуулан хүргэж үйлдвэрлэлийг бодитойгоор дэмжих, цаашид Монголын санхүүгийн системд санхүүгийн менежмент, менежерийн үүргийг өндөржүүлэх гэх мэт долоон арга замыг хөндөн тусгажээ. Засгийн газраас хэрэгжүүлж буй Оюу толгой, Таван толгойн гэрээг дэмжиж буйгаа ч тэд уламжилж байв.

Дэлхийн санхүү эдийн засгийн хямрал италийн мафийн орлого өсөхөд саад учруулсангүй.

johnyfx — Wed, 04 Feb 2009 07:08:49 GMT

2008 онд Италийн мафийн орлого 40 хувиар өссөн байна. Ингэж Италид зохион байгуулалттай гэмт хэрэг нь хамгийн ашиг орлогтой бизнес болон хувирав гэж Bloomberg нь Eurispes гэдэг нийгэм-соёлын судалгааны хүрээлэнгийн мэдээ болон SOS Impresa гэдэг бизнесменүүдийн холбооны мэдээг ишлэл болгон дурьдсан байна.

Хямрал болж байгаа хэдий ч мафи нь өөрийн орлогыг 2007 онд 90 млрд евро байсныг 2008 он гэхэд 130 млрд евро болгон өсгөж чадсан байна. Орлогын гол эх үүсвэр нь хар тамхины худалдаанаас орж ирдэг ба энэ нь жилд 59 млрд еврогийн орлого оруулдаг байна. Дахиад 5,9 млрд-ыг зэвсэгийн наймаанаас олдог гэнэ. Зохион байгуулалттай гэмт этгээдүүд рэкет болон “хар” зээлээр 92 млрд евро олдог байна. Мафи нь өдөртөө 250 сая евро олдог. Дэлхийн санхүүгийн хямрал нь мафид маш ашигтайгаар эргэсэн гэж Роберто Савиано (Roberto Saviano) /италийн мафийн гэмт хэргүүдийн талаар зохиол бичдэг зохиолч/ үзэж байна. Яг ийм хямралын, хүнд хэцүү үед бизнес нь эрсдэлээс маш сул хамгаалагдсан байдаг байна.

АНУ хамгаалалтын системээ байрлуулах нь тодорхойгүй

johnyfx — Mon, 02 Feb 2009 16:11:28 GMT

АНУ-ын Ерөнхийлөгч Барак Обамагийн тэргүүлсэн шинэ засаг захиргаа пуужингийн довтолгооноос эсэргүүцэн хамгаалах систем байрлуулах төлөвлөгөөний хүрээнд Чехийн газар нутагт радарын бааз байрлуулах шийдвэрээсээ татгалзаж магадгүй гэж Чехийн гадаад харилцааны асуудал эрхэлсэн хорооны тэргүүн Жири Диенстбиер мэдэгджээ.

"АНУ урьдаас төлөвлөсөн пуужингийн довтолгооноос эсэргүүцэн хамгаалах системээ Зүүн Европын оронд ойрын хугацаанд байрлуулахгүй болов уу гэдэгт би найдаж байна. Дэлхийн санхүүгийн хямрал энэ төлөвлөгөөг хойшлуулах сайхан шалтаг болж болох юм" гэж Диенстбиер мэдэгджээ.

Америкийн пуужингийн радарын бааз АНУ-Оросын шинэ хамтын ажиллагааны нэг хэсэг болсон үед л АНУ-ын хамгаалалтын системийн энэ төлөвлөгөө хэрэгжих боломжтой гэж хууль тогтоогчдын үзэж байгаа юм. "Дэлхийд НАТО, Орос, АНУ-ын хамтран эзэмших пуужингийн довтолгооноос эсэргүүцэн хамгаалах систем л байна. Эс бөгөөс ямар нэг бааз байхгүй" гэж Диенстбиер нэмж мэдэгдсэн байна.

"Пуужингийн радарын бааз байгуулах ажил АНУ-ын хувьд тийм ч яаралтай асуудал биш байсан. Баазад ашиглах техник хэрэглэлийг батлаагүй байгаа" гэж АНУ-ын үе үеийн Ерөнхийлөгч нарын аюулгүйн байдлын хуучин зөвлөх Збигниев Брежинский мэдэгджээ.

Чех-АНУ-ын төлөөлөгчид өнгөрсөн онд Чехийн газар нутагт пуужингийн радарын бааз байгуулах гэрээ байгуулсан билээ. Гэсэн хэдий ч энэ гэрээг Чехийн парламентын хурлаар батлаагүй байгаа юм. Тус улсын Засгийн газрын зарим нэг эвсэл уг төлөвлөгөөг эсэргүүцэж, радарын баазтай холбогдох санал асуулгаар чех иргэдийн гуравны хоёр хувь нь бааз байрлуулахын эсрэг байгааг харуулсан байна.

Экспортын татвар буурлаа

johnyfx — Sat, 31 Jan 2009 08:50:41 GMT

Ирэх сарын 1-нээс нефтийн экспортын татвар тонн нь 119-100 доллараар буурна гэж ОХУ-ын Сангийн яамны гаалийн төлбөрийн хэлтсийн дарга А.Сакович мэдэгджээ. Хэрвээ энэ сарын 15-наас өмнө нефтийн зах зээл дээр нэг их өөрчлөлт орохгүй бол экспортын татвар багасах юм байна.

Ийнхүү хоёрдугаар сарын татвар нь өнгөрсөн оны 8 дугаар сараас 10 дугаар cap хүртэлх хугацаанд мөрдөж байснаас тав дахин буурч, тонн нь 495 долларт хүрэх аж. Сүүлийн хагас жилд дэлхийн зах зээл дээр нефтийн үнэ бараг 80 хувиар буурсан нь экспортын татварыг бууруулахад нөлөөлжээ. Сангийн яамны мэдээгээр 2008 оны 12 дугаар сарын 15-наас 2009 оны 1 дүгээр сарын 11-ний хугацаанд оросын нефтийн дундаж үнэ баррель нь 39.8 доллар байв.

Өнгөрсөн онд Орост устөрөгчийн үнэ эрс буурсан билээ. Тиймээс Оросын Засгийн газар экспортын татварын механизмыг өөрчилж, нефтийнхэнд ийнхүү нааштай алхам хийжээ.

Эдийн засгийн асуудлаар мэтгэлцээн хийв

johnyfx — Sat, 31 Jan 2009 08:39:59 GMT

Маргааш болох Иргэний нийгмийн өдөрт зориулан Дэлхийн банкны Монгол дахь суурин төлөөлөгчийн газраас “Хөгжлийн мэдлэгийн өдөр” арга хэмжээг зохион байгуулж буй. Энэхүү багц арга хэмжээний хүрээнд өнөөдөр 10.00 цагт дэд бүтцийн асуудлаар мэтгэлцээн өрнүүлсэн бол 14.00 цагаас МУИС-ийн II байрны номын санд эдийн засгийн сэдвээр чөлөөт хэлэлцүүлэг өрнүүллээ. Ерөнхий илтгэлийг Дэлхийн банкны эдийн засагч Ш.Алтанцэцэг тавьж, оролцогсод санал бодлоо илэрхийллээ. Мөн энэ өдөр Нээлттэй нийгэм хүрээлэнгийн байранд байгаль орчны сэдвээр хэлэлцүүлэг өрнүүлсэн юм. Эдийн засагч Ш.Алтанцэцэг Монгол Улс хямралтай нэгэнт тулгарсан учир аль болох орлогоо нэмэгдүүлж, хэрэглээгээ хянах шаардлагатай гэж байлаа.

АНУ-ын Үндэсний тагнуулын албаны тэргүүнийг Сенат батлав

johnyfx — Sat, 31 Jan 2009 08:38:42 GMT

АНУ-ын ерөнхийлөгч Барак Обамагийн шилсэн Дэннис Блэрыг АНУ-ын Үндэсний тагнуулын албаны даргаар Сенат баталлаа. Энэ тушаалд тэрбээр Майкл Макконнеллыг солин орно. Түүний мэдэлд нийтдээ 50 тэрбум долларын төсөвтэй 16 тагнуулын газрууд захирагдана.

Чөлөөнд гарсан адмирал Дэннис Блэр тэнгисийн цэрэгт 34 жил алба хаасан ба тухайн үедээ Номхон далайн бүс дэх Америкийн зэвсэгт хүчний нэгдсэн командлалыг толгойлж байлаа. Үүний зэрэгцээ Блэр нь Тагнуулын төв газарт орлогч дарга байсан бөгөөд Хятадын талаарх мэргэжилтэн гэгддэг.

Сенат удалгүй Тагнуулын төв газрын тэргүүнийг батлах юм. Энэ тушаалд Леон Паннетийг Обама дэвшүүлсэн билээ.

Испанийн эдийн засгийн өсөлт зогсов

johnyfx — Sat, 31 Jan 2009 08:37:25 GMT

Испанийн Төв банк. Гэрэл зургийг Serjio

Испанийн эдийн засаг 1993 оноос хойш анх удаагаа өсөлтгүй гарлаа. Өнгөрсөн жилийн дөрөвдүгээр улирлын дүнгээр тус орны дотоодын нийт бүтээгдэхүүний хэмжээ 1,1 хувиар татарчээ. Өмнөх гуравдугаар улиралд нь эдийн засаг нь 0,2 хувийн уналттай байлаа. Хоёр улирал дараалан эдийн засгийн өсөлт гарахгүй байхыг рецесси буюу техникийн уналт гэж нэрлэдэг. Испанийн Засгийн газрын тооцоогоор тус орны эдийн засгийн уналт нь дэлхийн хямралын улмаас 2009 онд үргэлжлэх ажээ. Жилийн дүнгээр эдийн засгийн уналт 1,6 хувь байх юм.

Өнгөрсөн оны сүүлийн улиралд ажилгүйдэл 13,91 хувиар өссөн байна. Өмнөх улиралд нь албан ёсоор бүртгэгдсэн ажилгүйчүүдийн тоо 11,33 хувь болон Европдоо тэргүүлж байлаа. Засгийн газар нь энэ оны хувьд ажилгүйдэл 15,9 хувьтай гэж дүгнэжээ. Харин Европын холбоо Испанийн ажилгүйдэл 18,7 хувьд хүрнэ гэж үзсэн байна.

Еврокомиссийн тооцоогоор евро бүсийн дотоодын нийт бүтээгдэхүүн 2009 онд 1,9 хувиар багасах бөгөөд тэр нь Европын валютын үйлчилгээний бүсийн түүхэнд хамгийн доогуур үзүүлэлт болно. Еврокомиссийн урьдчилсан тооцоогоор өнгөрсөн жилийн сүүлчээр Европын зохицуулагч нь энэ үзүүлэлтийг 0,1 хувиар өснө гэж байлаа.

Евро бүсийн эдийн засаг 2008 оноос рецессид орсон ба уналт нь өнгөрсөн жилийн хоёр, гуравдугаар улиралд 0,2 хувь, дөрөвдүгээр улиралд 1,5 хувьтай байжээ.

Путин дэлхийн хямралын шалтгааныг нэрлэв

johnyfx — Sat, 31 Jan 2009 08:35:57 GMT

Швейцарийн Давост нээгдсэн дэлхийн эдийн засгийн чуулга дээр үг хэлсэн ОХУ-ын ерөнхий сайд Владимир Путин өнөөгийн даяарчлалын хямралын гол шалтгаан нь тогтсон санхүүгийн систем гэж мэдэгдлээ. Хямралын бас нэг шалтгаанаар тэр зохицуулалтын чанар сул байсан гэв. Мөн өсч буй зээлийн эрэлт ба түүнийг хангах эх сурвалжийн зөрөө их байсныг тэр тэмдэглэв.

Улс орнуудын дотор ч дэлхийн бүс нутгийн хооронд ч эд баялгийн хувиарлалт тэнцүү биш байсан гээд тэрбээр эдийн засагт төрийн оролцоог хэт их болгохоос болгоомжлууллаа. “Зах зээлийн зохицуулалт алдагдсан учир хямралын нөхцөлд төрийн оролцоо байхаас өөр аргагүй. Гэтэл зах зээлийн механизмыг төгсжүүлэхийн оронд эдийн засагт төрийн оролцоог нэмэх шохоорхол гарч ирлээ. Хямралын эсрэг арга хэмжээний нөгөө тал нь бараг бүх оронд төрийн гарт илүүдэл хөрөнгийг атгуулж байна” хэмээн Оросын ерөнхий сайд онцлов.

Виртуаль мөнгө, “хэт дөвийлгөсөн” тайлан ба чансаанаас татгалзахыг уриалсан байна. Хямралын үеэр бизнесийн өр ба муу хөрөнгийг цайруулах нь зүйтэйг тэр бас хэлэв. Хэд хэдэн нөөц валют гаргах саналыг Путин дэвшүүлсэн байна.

Даяарчлалын эрчим хүчний аюулгүй байдлын системийг байгуулахдаа хөрөнгийн солилцоо хийхийг тэр санал болгосон ба тэр нь оролцогч бүрийн хариуцлагыг өндөржүүлнэ гэж Путин мэдэгдлээ.